Bompengar på E39: Lokale Ap-politikere Kritiserer eiga regjering

Bompengar på E39: Lokale Ap-politikere Kritiserer eiga regjering

Den nye vegen er så dyr å køyre, at folk i staden vel den trafikkfarlege gamlevegen. No reagerer lokale Ap-toppar mot eiga regjering.

Jan Øyvind Åvik (tv) og Kenneth Mørk er gruppeleiarar for Ap i høvesvis Lindesnes og Kristiansand.

Vi rapporterer frå Sørlandet

Det kostar no 110 kroner å køyre ny E39 mellom Kristiansand og Mandal.

– Det er ein smått absurd situasjon, seier Jan Øyvind Åvik, gruppeleiar for Ap i Lindesnes.

I årevis har regionen kjempa for motorveg gjennom Agder. Den skal sørge for ein felles bu- og arbeidsmarknad.

– Og så endar vi opp med ein ny veg som ingen har råd til å bruke. Det er nesten uforståeleg at vi kan rote oss opp i dette hjørnet, seier Åvik.

Mange bilistar vel å køyre gamal E39 sidan den nye (i bakgrunnen) er for dyr.

Han står ved Trysfjorden i Kristiansand saman med Kenneth Mørk som er gruppeleiar for Ap i Kristiansand.

Her har ein utsyn til både nye og gamle E39.

Fire vogntok køyrer forbi på gamle E39 der det er gratis å køyre. Også mange pendlarar vel den gamle vegen.

Det er ikkje god Ap-politikk meiner Kenneth Mørk.

– Kva du tener skal ikkje ha noko å sei for om du kan køyre på ein god og trygg veg. Men slik opplegget er no, så har det noko å sei.

-Det er nesten uforståeleg at vi kan rote oss opp i dette hjørnet, seier Jan Øyvind Åvik, gruppeleiar for Ap i Lindesnes.

Den nye E39 er ein del av motorvegprosjektet Oslo - Stavanger.

Vegen sto klar i november 2022, men det viste seg raskt at det var for lite trafikk på den.

I februar 2024 steig prisane med 30 prosent.

Regjeringa har sidan den gong lova å kome med tiltak.

– Eg syns det har gått altfor seint. Dei har hatt veldig lang tid til å jobbe med denne saka. Vi føler ikkje at vi har komme så veldig mykje lenger, seier Kenneth Mørk.

Det kostar no 110 kroner for ein bensin- eller dieselbil mellom Kristiansand og Mandal. Det er med autopass.

Sjølv om økonomien blei noko betre då prisane steig, gjekk trafikken ned. Bilistane valde den gamle vegen.

På delar av den gamle vegen er trafikken no høgare enn på den nye.

Saka har gått fram og tilbake mellom fylkestinget og regjeringa utan at det har kome noko løysing på problemet med dei høge prisane.

– Både regjeringa og fylkestinget må kikke seg sjølv i korta og slutte å peike på kvarandre. Dei må heller vere konstruktive og pragmatiske for å finne løysningar som tar trafikken tilbake, seier Jan Øyvind Åvik.

Ein trailer køyrer forbi på gamle E39. Også tungtransporten vel gamlevegen framfor den nye.

Regjeringa er villeg til å gjere noko, og har lova å kome tilbake med ei heilskapleg opplegg.

Dei har mellom anna bede Vegdirektoratet om å greie ut ein bom på den gamle vegen.

Då blir bilar tvinga over på ny E39 og ein får inn meir pengar. Lokaltrafikken skal skånast.

Tidlegare samferdselsminister Jon-Ivar Nygård meinte dette kunne bidra til å løyse problemet. Vegdirektoratet jobbar framleis med ei slik løysing og skal levere arbeidet til Samferdsledepartementet i slutten av månaden.

NRK har bede om eit intervju med den nye samferdselsministeren Kamzy Gunaratam om saka og avventar eit svar frå henne.

Les også Bommen skulle bort etter 15 år – kan bli ståande i 30

Forslaget om bom på gamlevegen er ikkje populært lokalt. Heller ikkje hos dei lokale Ap-toppane.

– Vårt anliggande er å gjere den nye vegen så god og rimeleg som mogleg. Då må vi ikkje spore av debatten med sidevegsbommar og den type ting, seier Kenneth Mørk.

Dei har no fremja ei rekke konkrete tiltak. Mellom anna ei maks grense for kor mykje ein betaler kvar månad. Dei foreslår også lågare takstar vinterstid og at bommane blir ståande lenger.

– Kva forventar de av ny samferdsleminister?

– At den nye ministeren set seg ned og ser alvorsgraden i dette slik at vi får ei løysning som gjer at trafikken kjem tilbake på den nye vegen, seier Jan Øyvind Åvik.

Jan Øyvind Åvik og Kenneth Mørk meiner eiga regjering ikkje har gjort nok for å få ned prisane på E39.

Det meste av det som blir samla inn i bommen, går ikkje til vegen, men til banken. Om lag 60 prosent av det som blir betalt inn er renteutgifter.

Det er samla inn 1,76 milliardar i bompengar sidan vegen har opna. Av dette har 732 millionar gått til å betale renter.

Eit fleirtal på Stortinget er villege til å la bommane stå lenger. Då blir det innkrevjing i 30 år i staden for 15.

Også Ap lokalt ynskjer ei slik løysing.

Agder fylkeskommune har tidlegare sagt at fleire år med innkrevjing vil innebere auka utgifter til renter.

LES MER:              ©NRK.NO